Sámi ofelaččat leat dál álggaheame mátkkoštallama ja vuosttaš logaldallan lea Oslos.
Sámi ofelaččat leat dál gergosat álggahit galledanmátkkoštallama joatkkaskuvllaide Norggas.
Mátkkoštallama sii álggahit disdaga Kubenis, mii lea Oslo stuorámus joatkkaskuvla, gos sii maiddái leat gaskkavahku.
Sii leat dán vahkku Oslos buot njealjis ja maŋŋil Kuben joatkkaskuvlla sii galledit Blindern joatkkaskuvlla duorastaga ja Nydalen joatkkaskuvlla fas bearjadaga.
Veahá balus
Dán jagáš Sámi ofelaččat Vanja Tørresdal, Eli Karianne Vesterheim Hætta, Ellen Karen Inga Skum ja Maria Gunilla Påve Wilks leat ilus go dál viimmat besset johtui mátkkoštemiin.
– Mii leat gal veahá balus ovdal vuosttaš logaldallama, muhto šaddá hui somá viimmat boahtit johtui dáinna bargguin, lohká ofelaš Maria Gunilla Påve Wilks preassadieđáhusas.
Lei dalá gielddaministtar Erna Solberg gii fuomášii álggahit Sámi ofelaš doaimma ja doaibma álggahuvvui 2004:s.
Sámi ofelaččat logaldallet sámi historjjá, servvodaga ja kultuvrra birra ja sii mátkkoštit miehtá Norgga.
Ulbmil ofelašdoaimmain lea ahte dáža skuvllat ožžot sámi nuoraid bokte deaivvadanbáikki sámi servvodagain.
