Sámi parlamentáralaš ráđi (SPR) konferánssa oktavuođas galggai lágiduvvot nuoraidkonferánsa dán mánu loahpas Árvvesjávrris.
Heajos ruhtadili geažil šaddá Sámedikki nuoraidráđđi šluhttet konferánssa.
Nuoraidráđđi lea bivdán ruđa lágideapmái badjel jagi áigi, muhto Sáminuoraid jođiheaddji Sara-Elvira Kuhmunen muitala ahte eai leat ožžon čielga dieđu áiggil.
Ruoŧa beale Sámedikkis čujuhit gáržžes ruhtadillái, muhto oaivvildit leat buori áiggis addán dieđu ja juolludan 150 000 Ruoŧa ruvnno konferánsii.
Dan dieđiha SVT Sápmi.
