Sámi nuorat Oslos ásahedje iežaset Sámi night cluba, Norgga oaivegávpogis, go lei váilevašvuohta kultuvrralaš doaluide sámi nuoraide.
Sámi nuorat Oslos ásahedje iežaset Sámi night cluba, Norgga oaivegávpogis, go lei váilevašvuohta kultuvrralaš doaluide sámi nuoraide.
– Idja lea sámi konseartakonseapta, ráhkaduvvon Oslo nuorain, Oslo nuoraide. Oslove Noereh válddii initiatiivva álggahit dán konseapta Oslo nuoraide. Oslove Noereh lea ođđa báikkálaš searvi, mii lea vissa dušše jagi boaris. Nuorain leamaš guhká jo dárbu kultuvrralaš doaluide. Dáppe leat issoras ollu studeanttat ja nuorra sisafárrejeaddjit geat leat 20-ahkásaččat, geat fárrejit deike bargat. Mii leat ieža dan ahkejoavkkus ja leat váillahan dákkár doaluid. Dalle mii válddiimet ieža initiatiivva lágidit doaluid, lohká Idja – Sámi night club prošeaktajođiheaddji Alice Marie Johansen.
Váillahan doaluid
Prošeaktajođiheaddji muitala sámenuoraide leat váilon kultuvrralaš doalut Norgga oaivegávpogis Oslos. Idja – Sámi night club, leage varas konseartakonseapta Oslo nuoraide. Odne lea dat goalmmát konsearta mii lágiduvvo dán jagi. Ulbmil lea ahte sámenuorat galget beassat gullat sámi musihka Oslo gávpogis.
Son lohká sámi nuorat leat váillahan doaluid sámi nuoraide.
– Dáppe leat hui ollu doalut sihke sámi mánáide ja ollesolbmuide, muhto dáppe eai gávdnon doalut sámi nuoraide ja danne mii leat ásahan dákkáraš konseapta, muitala Alice Marie Johansen.
Dutkamat
Dutkamat čájehit ahte 26 proseantta Norgga studeanttain dovdet dávjá dahje hui dávjá okto, dán čájeha dutkan man Sentio-iskkadeapmi lea čađahan universitehtas ja Norgga studeantaorganisašuvnnas.
Iskkadeapmi čájeha ahte studeanttat Oslos ja Akershusas leat nuorat geat dávjjimusat dovdet iežaset okto. Olles 12 proseantta dovdet hui dávjá okto ja 16 proseantta dovdet ieža dávjá okto.
– Lea ollu sáhka ahte studeanttat dovdet iežaset okto ja dan oktavuođas bohtet lossa jurdagat, ja maiddái lea unna biras gos studerejit ja dalle dieđusge hui dehálaš suodjalit sámevuođa ja sámi studeanttaid. Sus geas ii soaitte leat nu stuorra biras dahje ii dovdda ovttage go fárre deike Osloi, de galgá Idja – Sámi night club lunddolaš čoahkkananbáiki sámi nuoraide, lohká prošeaktajođiheaddji Alice Marie Johansen.
Sámi konsearttat
Son muitala sii leat doallan guokte konseartta ovdal.
– Min vuosttaš konsearta lei guovvamánu viđát beaivvi, Ailu Valliin, ja nubbi konsearta lei njukčamánu 11. beaivvi, artisttain Ylvain. Dál bearjadaga lea mis konsearta Katarina Barrukiin. Vuosttaš konsearttas vuvdojedje badjelaš čuođi bileahta ja Ylva konsearttas lean mun veaháš eahpesihkar, ledje vissa lagabui 50 logi bileahta vuvdon. Dát lea hui varas konseapta, nu mii leimmet sakka hirpmástuvvan go nu ollugat bohte min vuosttaš konsertii ja dat lei hui somá, dadjá Idja – Sámi night club prošeaktajođiheaddji Alice Marie Johansen.
