Teáhter rahpasa gehččiide ja sii ávvudit rahpama “Jallas stállu” čájálmasain.
Sámi Našunálteáhter Beaivváš illuda go duorastaga miessemánu 7. beaivvi rájes lea vejolaš lágidit čájálmasaid main leat vuollel 50 geahčči. Teáhter ávvuda dán buori ođđasa čájálmasain “Jallas stállu” man neavttár Iŋgor Ántte Áilu Gaup ovdanbuktá, ja dása mii leat bovden mánáidgárdemánáid geahččin.
Nuvttá ja rabas buohkaide
Sotnabeaivve miessemánu 10. beaivvi čájehuvvo ges vuosttaščájálmas neahtas, ja de lea vejolaš geahččat mánáidčájálmasa “Hamelna roahttobivdi” man neavttár Egil Keskitalo ovdanbuktá. Dát fálaldat lea nuvttá, ja rabas buohkaide.
Mánáidčájálmasat “Jallas stállu” ja “Stállu ja guovssahasa bárdni” čájehuvvojit maid neahtas dán mánu.