Sámi muohtadutki dutkamuš lea duogážis Nils Henrik Asheim bihtás, mainna vuittii Davviriikkaid Ráđi musihkkabálkkašumi.
Musihkkabálkkášupmái mii ikte geigejuvvui, ledje 13:s nominerejuvvon. Vuoiti nammaduvvui Norgga oaivegávpogis Den norske Opera & Ballettas ja oažžu 350 dánskka ruvnno.
Nils Henrik Asheim riegádii Oslos 1960:s, muhto orru dál Stavangeris. 58-jahkásaš lea váldán oahpu Norgga musihkkaallaskuvllas.
Son lea ovdal vuoitán bálkkašumiid, earret eará Spellemannbálkkašumi.
Sámi muohtasánit duogážin
Šuokŋadahkki Asheim oaččui musihkkabálkkašumi iežas barggus «Muohta», koara ja čuojahanjoavkku ovddas, mii lea komponerejuvvon Joseph Haydna «Årstiden»ii.
Jury dán ráđis govvidii Asheima vuoitibarggu ná «musihkka mii lea sihke dálááigi seammás go lea historjá».
– Asheima musihkka dávjá reflektere dihtomielalašvuođa das mo heive historjjálaš árbevirrui ja oktavuhtii, seammás go doložiid dovdá dán áigásaš jietnamáilmmiid bokte, čállá Davviriikkaid Ráđđi preassadieđáhusas.
«Muohta» bihtás ožžot maid álgoálbmogat jiena; bihttá lea gásttašuvvon sámi namain ja teakstavuođus leat 18 sámi muohtasáni, čállá ráđđi.
– Juohke áidna dáin 18 oasis suokkardallet sámi muohtasáni, mat čujuhuvvojit Inger Marie Gaup Eira dutkamii «Muohttaga jávohis giella». Muhtin sánit govahallet njuolgut muohttaga, eará sánit ges mo muohta váikkuha olbmuid árgabeaivái, nu mo ulahat, mii mearkkaš dálveluodda mii lea nu jovgon ahte ii báljo oidno, čállá Davviriikkaid Ráđđi.
Eará vuoitit
Auður Ava Ólafsdóttir, Bárður Oskarsson, Benedikt Erlingsson, Ólafur Egill Egilsson, Marianne Slot, Carine Leblanc ja Per Ole Frederiksen, Pâviârak Jakobsen ja Nette Levermann ožžo maid bálkkašumiid seamma eahkeda.
