Sámi pedagogalaš fágabeivviin, mat lágiduvvojit Girkonjárggas ihttá rájes, čalmmustuhtto Várjjaga sámemánáid skuvlladilli.
Sámi pedagogalaš fágabeivviin, mat lágiduvvojit Girkonjárggas ihttá rájes, čalmmustuhtto Várjjaga sámemánáid skuvlladilli.
Dát konferánsa lágiduvvo vuosttaš geardde Várjjat guovllus ja bidjá erenoamáš deattu čalmmustahttit hástalusaid ja buriid ovdamearkkaid pedagogalaš praksisii Várjjat guovllus, čállá StatPed preassadieđáhusastis.
Konferánsa lágiduvvo Girkonjárggas 5. ja 6. beaivvi cuoŋománus.
Nannen sámi mánáid iešdovddu
Earret eará boahtá Tove-Lill Labahå Magga muitalit juoiganprošeavtta birra mii lea lágiduvvon buot Várjjat skuvllain ja eanaš mánáidgárddiin.
Prošeakta galgá nannet sámi mánáid identitehta juoigama ja máinnasteami bokte.
– Máhttoloktema sámi evalueren čájeha ahte eai leat nagodan buot rivttiid sámi mánáin ollašuhttit. Dasa lassin čájehii SÁNAG raporta ahte sámi mánát vásihit eanet vealaheami go earát. Dat oktii lea dagahan ahte sámi mánáin Várjjat guovllus lea šaddan negatiiva identitehta. Negatiiva identitehta fas hehtte oahppama skuvllas. Juoigan prošeavttain leat geahččalan jorgalit dán, dadjá Labahå Magga.
Modealla maid sáhttá riikaviidosaččat ávkkástallat
Bargovuohki lea leamaš buot ohppiid fátmmastit luohkáin ja oahpahit sin juoigat ja seammás sámi kultuvrra birra. Sámi mánáin dasa lassin leat sierra deaivvadeamit, vai besset eará sámi mánáiguin leat fárrolaga.
Prošeakta lea juo 5 jagi leamašan doaimmas ja oahpaheaddjit muitalit ahte prošeakta váikkuha mánáide.
– Prošeakta leamaš hirbmat buorre Várjjat guovllus ja oahpaheaddjit muitalit ahte mánáin vuhtto positiiva identitehta. Dál leat geahčadeame movt sáhtášii dán bargovuogis dahkat našunála modealla, čilge Labahå Magga.
Eambbo dieđuid konferánssa birra gávnnat dáppe.
Konferánsa sáddejuvvo maid neahta bokte ja njuolggosáddaga sáhttá čuovvut dáppe.
