Dieđihanáigemearri Sámi Grand Prix 2023 juoiganoassái viiddiduvvo gaskavahkkui juovlamánu 21. b. rádjái. Lávlunoasi dieđihanáigemearri gal lea dievvan.
Sámi Grand Prix 2023 dieđihanáigemearri lei juovlamánu 1. b. ja dassážii ledje boahtán sisa 23 lávlaga muhto eai doarvái luođit.
– Ledje máŋga buori luođi boahtán dieđihanáigemearrái, muhto mii dárbbahit vel eambbo go Sámi Grand Prix lea dat stuorimus lávdi gos árbevirolaš luohti beassá gullot ja báitit ja dan dihte viiddidit dieđihanáigemeari, dadjá Sámi Grand Prix buvttadeaddji Ol Johan Gaup.
– Dalle go álggahuvvui SGP lei juste ulbmilin oažžut ovdán ođđa dahkkojuvvon luđiid ja loktet daid stuorámus lávddiide, ja dat mihttu lea ain mis go lea mávssolaš beassat gullat ja oaidnit ovtta dain min deháleamos kulturárbbiin maiddái TV- ja neahttasáddagis mii oidno miehtá davviguovlluin lassin doppe gos lunddolaččat gullat luođi ja juoigama.
Dieđihanáigemearri lea viiddiduvvon gaskavahkkui juovlamánu 21. b. rádjái ja sáhttá dieđihit luođi mii čuovvu muhtin min luohteárbevieruin ja mii ii leat almmuhuvvon ovdal.
Juoiganoasi ja lávlunoasi vuoiti oažžu goabbáge NOK 20 000 ja NOK 50 000-árvosaš stipeandda ja mainna sáhttá doallat konseartta Sámi beassášmárkaniin čuovvovaš jagi. Nubbi sadji oažžu NOK 10 000 ja goalmmát fas NOK 5 000. Son gii ovdanbuktá lávlaga/luođi lávddis ferte leat deavdán 16 jagi.
