Sámediggi ja Sámi Dáiddárráđđi leat soahpan ođđa ovttasbargošiehtadusa áigodahkii 2020-2024.
Dat lea joatkka dan formála ovttasbarggus beliid gaskka mii lea leamaš 2006 rájes. Šiehtadus galgá láhčit dili sámi kultuvrii.
Bealit leat soahpan ahte sis leat ovttalágan beroštumit sámi dáiddakultuvrra ovddideamis boahtteáiggis, ja leat ovttasbargošiehtadusas soahpan áŋgiruššansurggiid ja oassemihttomeriid dáiddapolitihkas ja hálddahuslaš beliin, álgoriektediliin, dáiddafágalaš beliin, gelbbolašvuođa buorideami beliin ja gaskkustanbeliin.
Sámediggeráđđi Henrik Olsen dadjá son lea movtta ja duhtavaš dan buori ovttasbarggu ektui maid Sámediggi ja Sámi Dáiddárráđđi leat ásahan
– Mun vuorddán mielas viidáset ovttasbarggu ja ovttasdoaibmama, ja sámi dáiddárat bohtet Sámi Dáiddárráđi ja dan čieža dáiddárorganisašuvnna bokte, main lea čatnašupmi dáiddárráđđái, ollu váikkuhit dan dáidda- ja kulturpolitihkkii maid Sámediggi čađaha, dadjá sámediggeráđđi Olsen.
Meannuduvvo
Bealit leat soahpan jahkásaš šiehtadusaid joatkimis ja čađaheamis sámi dáiddáršiehtadusa hárrái, ja dat šihtton ovttasbargošiehtadus galgá láhčit diliid sámi girjjálašvuođa, luđiid, musihka, dánsuma, teáhtera, filmma, govvadáidaga ja dáiddaduoji háhkamii ja gaskkusteapmái.
Ovttasbargošiehtadus meannuduvvo Sámedikki dievasčoahkkimis dán vahkus. Nu čállá Sámediggi preasssadieđahusas
