Oahpaheaddjeoahppovisti, Romssa Norgga árktalaš universitehtas, lea čiŋahuvvon ođđa dáiddačohkkehusain.
– Buktagat mat gaskkustit Romssa jiena, sámi poesiijagirjji ja monumentála siskkobealaláš gáhtadáidagat leat dat ođđa buktagat mat leat earenoamážiid ráhkaduvvon ođđa oahppoheaddjuohppui, čállá dáiddahálddašanfitnodat KORO.
KORO nammasaš dáiddahálddašanfitnodat čájeha dáiddaprošeavttaid maid leaba ollislašvuođas heivehan kuráhtorat André Gali ja Bjørn Hatterud. Dáidagat galget čájehit oahpaheaddjeoahpu ovdahistorjjá, ja muittuhit ahte oahppomáddu boahtá davvin. Muđui leaba maid háliidan čájehit dáidagiid mat govvidit jávohis máhtolašvuođa, njálmmálaš buvttadeami eamiálbmothistorjjás, boares giehtaduodjeárbevieru ja báikkálaš, álbmotlaš vásáhusaid.
Dat geat sámi dáidagiid ovdanbuktet dáiddaprošeavttas leat earret eará Mary Ailonieida Sombán Mari, Niillas Helander ja Joar Nango.
Mary Ailonieida Sombán Maris lea dás diktačoakkáldat mas leat sámegiel ja dárogiel teavsttat, illustrerejuvvon abstrákta govaiguin.
