Eurohpá guhkimus beanavuodjingilvvu bisánanbáikkiin guoimmuheaba Agnete ja Katarina Barruk.
Dán jagi lágiduvvo Finnmarksløpet njukčamánu 10. beaivvis 18. beaivái.
Beanavuodjingilvvu oktavuođas lávejit kultuvrralaš ovdanbuktimat bisánanbáikkiin, ja dán jagi leat lágideaddjit válljen guokte sámi artistta dán bargui.
Agnete šattai dovddusin artistan 14-jahkásažžan go vuittii Melodi Grand Prix junior lávlungilvvu The BlackSheeps joavkkuin 2008:s. Gávcci jagi maŋŋel ovddastii Norgga Eurovision Song Contest gilvvuin «Icebreaker» šuoŋain. Son lea maid oassálastán «Stjernekamp» gilvvus mas šattai nubbin. Agnete Saba lea eret Reahpenis, Unjárgga gielddas.
Katarina Barruk lea eret Ruoŧa beale Sámis. Son ovdanbuktá šuoŋaidis ubmisámegillii man eai galle eará artistta hálddaš. UNESCO navdá ahte ubmisámegiella lea dan mađe áitojuvvon ahte sáhttá jávkat. Barrut lea ožžon bálkkašumiid go musihka bokte čalmmustahttá ja ovdánahttá ubmisámegiela. Son lea maŋimuš logi jagi čuojahan miehtá Eurohpá.
Agnete ja Katarina Barruk čuojaheaba: Guovdageainnus, Thon hoteallas, njukčamánu 11. beaivvi, diibmu 19:00. Deanus, Tana hotell & camping, njukčamánu 12. beaivvi, diibmu 19.00. Vuonnabađas, Várjjat Sámi Museas, njukčamánu 13. beaivvi, diibmu 18.00. Girkonjárggas, torgas, njukčamánu 14. beaivvi, diibmu 19.00. Kárášjogas, Sápmi Parkas, njukčamánu 16. beaivvi, diibmu 19.00
