Sámevuohta guovddážis Čohkkirasas dán vahkkoloahpa

Dál lea goalmmát jahki go sámi kulturfestivála lágiduvvo dán vahkkoloahpa Čohkkirasas, Ruoŧas. borgemánu 19.-21. beaivvi leat márkanat gilážis mii lea 20 miilla davábealde poláragierddu. Dáppe deaivvadit sihke sámi neavttárat, sámi artisttat, sámi dáiddárat ja eará guossit.

Sápmelaččat guovddážis

Lágideddjiide lea hui dehálaš ahte sámevuohta ja sápmelaččat leat guovddážis dán festiválas.

 – Mii leat válljen sápmelaččaid guovddážii dán festiválas. Ulbmil dainna lea ahte mii áigut váikkuhit sámi servvodaga girjáivuođa, hutkáivuođa ja hástalusaid boahtit oidnosii servvodagas, čilge Nils Torbjörn Nutti, Nutti Sámi Siidda eaiggát ja direktevra, mii lágida dán festivála.

Loktet dási sámi márkaniin

Čohkkiras Sámi Márkana lágideaddjit áigot geahččalit loktet dási sámi márkaniin.

 – Dasa lassin ahte dá lea sápmelaččaide deaivvadanbáiki, de mii fállat earret eará logaldallamiid, sámi borramuša, čájáhusaid, guoimmuheami ja dujiid. Dáiddárat ja duojárat bohtet márkaniidda vuovdit iežaset dujiid, lohká Nutti.

Ášši joatká gova vuolde:

Geasuhit olbmuid konsearttain

Ođasin dán jagi leat eahketkonsearttat. Diibmá lei unna konsearttaš, muhto dán jagi leat válljen stuoridit vel veahá.

 – Dál lea vuosttaš jahki go dan geahččalit. Mii leat ožžon earret eará Sámi Grand Prix vuoiti Melina Kuhmunen, juoigi Lars-Ante Kuhmunen, lávlu Yana Mangi ja ráppara Kitok lávlut ja čuojahit márkaniin.

Alla vuordámušat

Lágideddjiin leat alla vuordámušat dán jagáš doaluide.

 – Diibmá manai hui bures, ja olu olbmot fitne márkaniin. Nu ahte dán jagi mus gal leat alla vuordámušat, ja doaivvun olu olbmuid finadit dáppe. Dálki mearrida dieđusge olu. Jus lea fiertu, de gal geasuha olbmuid. Nu ahte sávan fierttu ja beaivvádaga vahkkolohppii, loahpaha Nutti.