-Almmuhus-
-Almmuhus-
OĐĐASATSámenuorat háliidit dárogiela sámegiela sadjái

Sámenuorat háliidit dárogiela sámegiela sadjái

-

-

Guovdageainnu AUF dáhtošii dál dárogiel matematihkkagirjjiid Guovdageainnu nuoraidskuvllas sámegiel girjjiid sadjái, go oaivvildit dat geahpidivčče sirdima joatkkaskuvlii gos oahpahus lea dušše dárogillii. GEAHČA FILMMA ÁŠŠIS.

AUF nubbinjođiheaddji Eli Karianne Vesterheim Hætta muitala alddis maid leamašan hástalusat matematihkain go sirddii nuoraidskuvllas joatkkaskuvlii go lei tearpmaid ja doahpagiid oahppan dušše sámegillii.

– Danne livččii dehálaš ahte oahppit ohppet internašunála matematihkkasániid vuođđoskuvllas juo, lohká son.

 

Eatnigillii buoremus

Nuoraidskuvlla rektor mieđiha ahte matematihkkagirji maid dál atnet skuvllas ii leat áibbas buorre, muhto oaivvilda liikká ahte lea buoremus oahppat iežas eatnigillii.

– Sámegiella gal lea girjjis buorre, muhto váttisvuohta lea ipmárdusa oažžut doahpagiin, go dat sánit gullojit dušše matematihkkaoahpahusas ja beare unnán muđui servvodagas, lohká son.

 

–Ii álkit eará gillii

Nuoraidskuvlla matematihkkaoahpaheaddji Ole Einar Hætta čilge sii eai leat dušše matematihkkaoahpaheaddjit, muhto maiddái giellaoahpaheaddjit.

– Mis lea maid ovddasvástádus sámi servvodahkii ráhkanahttit min ohppiid , ja de leage giella hui dehálaš oassi. Matematihkka ii šatta álkit vaikko eará gillii oahpahuvvo, lohká son.

-Almmuhus-