Sámediggeráđđi lea juolludan beallemiljovnna ruvnno Ájluovtta fitnodahkii vai eai dárbbaš oastit fiberfárpaliid Ámerihkas go dat lea hui stuora gollu.
Doarjja lea juolluduvvon Pro Pack Container AS fitnodaga ásaheapmái Ájluktii mii lea Hábmer suohkanis. Pro Pack Container AS galgá ge buvttadit fiberfárpaliid «The Quartz Corp AS» fitnodahkii mii buvttada ráinnas kvartsgeđggiid Ájluovttas. Sii ostet dál fiberfárpaliid USA:s mii lea sihke divrras ja hástaleaddji guhkes gaskka dihte.
Duhtavaš
Sámediggeráđđi Silje Karine Muotka (NSR) lea hui duhtavaš go sáhtte doarju dán industriijavuoruheami.
– Dál, go ásahuvvo Pro Pack Container AS fitnodat, de beassá The Quartz Corp oastit fiberfárpaliid báikkálaš buvttadeaddjis. Dat lokte árvoháhkama Hábmeris, go lea báikkálaš buvttadeapmi, dadjá Silje Karine Muotka preassadieđáhusas.
Ruhtadeapmi sajis
Sámediggeráđi oainnu mielde šaddet Pro Pack Container AS olis bargosajit main lea ge erenoamáš gelbbolašvuohta, ja ja Muotka oaivvilda ásaheami hui dehálažžan ealáhusaide ja servodatovdáneapmái suohkanis.
– Eará ruhtadeamit ledje juo sajis, ja mii leat hui ilus go Sámedikki doarjagiin lea prošeakta ollislaččat ruhtaduvvon, dadjá Muotka loahpas preassadieđáhusas.
