Sámediggi lea dál válbmen válgajienastuslogu mii adno vuođđun čavčča válggaide. Logut čájehit maid ahte leat golbma válgabiire gos lea lassáneapmi, ja okta válgabiire mas eai leat báljo lassánan jienasteaddjit.
Almmolaš logut čájehit ahte leat 20.005 olbmo čálihuvvon Sámedikki válgajienastuslohkui, ja nu lea jienastuslohku lassánan 3047 olbmuin ovddit válgga ektui.
Dievasčoahkkima jođiheaddji Tom Sottinen (Bb) lea duhtavaš loguiguin ja go eambbogat válljejit čálihuvvot válgajienastuslohkui.
– Dat lea buorre go válgajienastuslohku lea lassánan. Logut čájehit ahte Sámediggi lea dehálaš sámi álbmogii, dadjá čoahkkinjođiheaddji Tom Sottinen preassadieđáhusas.
Lulli-Norga stuorru
Leat golbma válgabiire main leat čalbmáičuohcci logut ja main lea stuoribuš lassáneapmi. Davvi válgabires lassánit 494 olbmo jienastuslohkui ja Gáissi válgabires ges lassánit 501 olbmo jienastuslohkui.
Lulli-Norgga válgabires lea stuorámus lassáneapmi gos 1635 olbmo dieđihedje jienastuslohkui maŋemuš válggaid rájes. Ávjovárri lea dat válgabiire gos lea unnimus lassáneapmi. Ávjovári jienastuslohku lassánii 7 olbmuin 2017 válgga ektui. Vuollelis lea tabealla man Sámediggi dál lea juohkán mediaide.
Nuorat servet jienastuslohkui
Vuosttaš geardde válljejeddjiid lohku maid bissu dássedit. Čavčča válggaide leat 223 vuosttaš geardde jienasteaddjit. 2017 válggaide lei lohku 218.
– Lea buorre go sámenuorat beroštit sámediggeválggain. Nuoraid jietna lea álo dehálaš buot válggaide, dadjá Sottinen.
Sámediggeválggat čađahuvvojit oktanaga Stuoradiggeválggaiguin, mánnodaga čakčamánu 13. beaivvi 2021. Sámediggi lea juhkkon čieža válgabiriide, ja buohkat geat leat čálihuvvon válgajienastuslohkui 30.06.21 rádjái, besset jienastit sámediggeválggaide. Oktiibuot leat 39 áirasa mat válljejuvvojit Sámediggái.
