Suoma beale Sámedikki kulturlávdegoddi juohká jagi 2020 kulturbálkkašumi Jaakko Gauriloffii bearjadaga, ođđajagemánu 24. beaivvi, Sajosis eahkedis Anáris.
Sámediggi čállá siiddustis ahte «Jaakko Gauriloff lea riegádan 1939:s Sue´nn´jel gilážis, Beahcámis ja lea nuortalašlávlu.
Son lea jáhkkimis vuosttas nuortalašgillii populáramusihka lávlon artista. Vaikke su dovdet šlágerlávlun, son máhttá maiddái leu´det nuortalaččaid árbevirolaš vuogi mielde». Kulturbálkkašupmi mieđihuvvo ohcamuša haga ja dan ulbmilin lea bálkkašit kulturbargi dahje dáiddára dovddastussan mearkkašahtti barggus sámi kultureallima buorrin.
Dilálašvuohta lágiduvvo eahkedis Sajos dálus Anáris ovttasráđiid Skábmagovaid Film Festivalain.
