Sámediggeráđđi lea juolludan doarjaga máŋgasii guolástusealáhusas, ja lohket dáinna lágiin fárus ásaheame bargosajiid boaittobeal báikkiide.
Sámediggi lea juolludan ruhtadoarjaga aitto ásahuvvon fitnodahkii «Båro AS» Láhpi suohkanis. Doarjagiin áigu ohcci oastit bivdofatnasa ja bivdosiid. Båro AS bivdá riddo-, vuotna- ja áhpeguovlluin. Fitnodaga eaiggádis, Jostein Bårdsen Rosenlundas, lea badjel logi jagi vásáhus guolástusealáhusas ja háliida fitnodatásahemiin guolásteami eallinláhkin. Doarjja lea 337 000 ruvnno.
Nanne ássama
Ráđđeláhtu Silje Karine Muotka (NSR) mielas lea positiivvalaš go guolástusealáhus addá bargosajiid Láhpi suohkanis.
– Ealáhus lea fárus nanneme ássama rittu guovlluin, ja dainna lágiin bajásdoallame ceavzilis mearrasámi servodagaid, čilge son.
Stuoridit ealáhusa
Sámediggeráđđi lea maiddái juolludan doarjaga VSK Fiskeredskaper fitnodahkii. Sii áigot hukset ođđa fierbmebuvttadanvistti Várdnái Gálssa suohkanis. Otná buvttadanvisti galgá stuoriduvvot 300 m2 sturrosaš huksehusain.
VSK Fiskeredskaper dadjá ohcamisttis ahte stuorideapmi lasiha buvttadankapasitehta ja árvoháhkama ja addá maiddái eambbo bargosajiid Gálsai. Sii árvvoštallet ahte stuorideapmi dagaha 2-3 ođđa bargosaji fitnodahkii. Doarjja lea 400 000 ruvnno.
Bivdofatnasa oasitit
Aitto álggahuvvon ovttaolbmofitnodat Valle Fisk AS Davvesiidda suohkanis, lea ges ožžon 331 000 ruvnno doarjaga sámediggeráđis. Valle Fisk lea vuotnaguolásteaddji ja doarjagiin áigu oastit bivdofatnasa ja bivdosiid. Fitnodateaiggáda, Frank-Arne Valle, mihttu lea vuosttažettiin alcces ásahit bargosaji, ja dasto maŋŋil ásahit vel nuppi bargosaji Davvesiidii.
Silje Karine Muotka čilge ahte ásaheapmi lea dehálaš Davvesiidda suohkanii, go guollevuostáváldis doppe lea dárbu ahte eanet báikkálaš fatnasat ilbmet.
– Mii fas dagaha ahte varasguollehivvodat gáddái lassána. Mii leat movttegat go Sámediggi lea fárus ásaheamis bargosajiid boaittobeal báikkiide. Guolástusealáhus lea guovddáš ealáhus máŋgga báikegottis riddogáttiin, ja barggaheami ja buriid rámmaeavttuid oktavuohta sáhttá lasihit ássama dáin guovlluin, loahpaha Muotka.
