Sámediggi lea juolludan 500 000 ruvnnu doarjjan Fávlemohkki DA searvedoibmii. – Mu mielas lea buorre go boanddat viiddidit doaluset ja válljejit investeret boahtteáiggi nammii, dadjá sámediggeráđđi.
Sii guđet eaiggáduššet searvedoaimma leat Else-Margrethe Ballo, Ulf Ballo, Trygve Ballo, Torstein Emanuelsen ja Solveig Ballo. Doalus leat 65 šibiha, muhto sis leat jo plánat viiddidit 92 šibihii. Vuosttaš vuorus galgá searvedoaibma investeret mielkerobohttarusttega luovosšibitnávehii.
– Mu mielas lea buorre go boanddat viiddidit doaluset ja válljejit investeret boahtteáiggi nammii. Dat čájeha ahte eanadoalus lea optimisma. Dat lea rievtti mielde bearašdoallu, ja mu mielas dakkár ovttasbarggu organiseren lea earenoamáš vuohki, go jurddašat lahtuid astoáiggi ja luomu ordnema, dadjá sámediggeráđđi Hans Ole Eira (GB) preassadieđáhusas.
Trygve Ballo, gii lea okta eaiggádiin, dadjá ahte Sámedikki doarjagiin sáhttet árabut álggahit searvedoaimma nuppi muttu mii lea náveha viiddideapmi.
Fávlemohkki DA buvttada 580 000 lihttera jahkái. Meieriija dárbbaha sihkkaris doaimmaheami ja dan sáhttá dat doallu ovddidit. Dasa lassin áigu doallu buvttadit šibitbierggu mii sáddejuvvo Kárášjohkii njuovahahkii, ja doallu sáhttá maiddái vuovdit guigguid ja burruid eará boanddaide.
– Dat leat dušše moadde ovdamearkka eanadoalu oalgeváikkuhusain Deanu servodagas, loahpaha duhtavaš sámediggeráđđi, Eira.
