Sámediggi lea juolludan 300 000 ruvnnu Miksapix Interactive AS-prošeavtta sámi 3D-speallaráidui.
Dat lea Raanaa speallaráiddu viđat speallu – Jiehtanasaid máilbmi.
Vuosttaš speallu dán ráiddus lei «Raanaa – noaidenieida» ja almmuhuvvui 2019:s. Raanaa lea jálos noaidenieida, guhte veahkeha sin geat leat váralaš dilis jiehtanasaid máilmmis. Raanaas leat noaidefámut ja sus lea magihkalaš gákti badjelasas, mii dagaha su hui geahpasin.
– Sámedikki strategiija lea loktet sámegiela mánáid ja nuoraid gaskkas, ja dakkár digitála spealut leat dehálaččat. Mađi eanet mánát ja nuorat besset speallat sámegillii, dađi buoret dat lea, lohká sámediggeráđđi Mikkel Eskil Mikkelsen preassadieđáhusas.
Viđát spealus spealli stivre karakteara goalmmátpersovnna perspektiivvas jiehtanasaid máilmmis. Spealus oahpásnuvvá sámi oskui, ipmiliid ja mytologiija elemeanttaiguin, ja maiddái norrøna mytologiijain. Lea innovatiivvalaš speallobuvtta, mas sámi ja norrøna mytologiija ja muitalusat kombinerejuvvojit.
