Sámediggeráđđi evttoha jahkásaččat juolludit 1 miljon ruvnno Ä’vv nuortalaš museii nannen dihte nuortalaččaid giellabarggu. Dasa lassin várrejuvvo 350 000 ruvnno Nuortalaš gili gáhttemii Njávdámis.
– Sámedikki mihttu lea ealáskahttit nuortalašgiela Norgga bealde ráji, ja mii háliidit doarjut giellabirrasa huksema. Miljon ruvnno museii nanne sin barggu sihke rájáid rastá ja báikkálaččat Mátta-Várjjagis. Leat eambbosat geat háliidit oahppat eambbo giela ja kultuvrra birra ja de fertet mii sihkkarastit ahte museas lea kapasitehta veahkehit, dadjá sámediggeráđđi geas lea ovddasvástádus gielas, Mikkel Eskil Mikkelsen preassadieđáhusas.
Nuortalašgiela kultuvra ja historjá lea ealáskahttindásis. Ovttas earret eará báikkálaš áŋgiris olbmuiguin lea Sámediggi bargan strategalaččat nuortalaš gielain, kultuvrrain ja historjjáin maŋimuš jagiid.
Doarjja Ä’vv nuortalaš museii lea oassin dan ealáskahttinstrategiijas man Sámediggi lea mearridan.
Nuortalaččaid deaivvadanbáiki
Nuortalaš gávpot Njávdámis lei Njávdán siidda geasseorohat, ja lea okta 12 ráfáidahttojuvvon kulturbirrasiin Norggas. Sámediggi eaiggáduššá oasi guovllus ja máŋga vistti.
Sámediggeráđđi evttoha áŋgiruššama njealji jagi badjel nannet Nuortalaš gili gaskkustanarenan.
– Sámediggái lea dehálaš váldit ovddasvástádusa dain visttiin maid mii oamastit. Onterihusa divodeapmi lea juo álggahuvvon, ja boahtte lávki lea čađahit Halonenviesu ortnegisdoallanbargguid. Mii háliidit ahte viessu galgá sáhttit leat nuortalaččaid deaivvadanbáikin, dadjá sámediggeráđđi Runar Myrnes Balto, geas lea ovddasvástádus kulturmuittuin ja bušeahtas.
