Sámediggeráđđi addá 300 000 ruvnno investerendoarjjan fitnodahkii Laksefjord Havn AS, mii áigu ásahit govdokáija báikkálaš ja eará sajis boahtán guolástanfatnasiidda Lágesvuonas.
Ohcci Arnkjell Bøgeberga fitnodat Laksefjord Havn AS lea aiddo ásahuvvon, ja áigumuš lea láigohit káija, fanassajiid ja ealáhusvisttiid. Fitnodat lea Álddagohpis Davvesiidda gielddas, ja sámediggeráđđi lea 300 000 ruvdnosaš doarjaga juolludan mariidna ealáhusaid doarjjaortnegis.
– Dát prošeakta oainnusmahttá ahte máŋggaid jagiid lea leamaš dárbu fanassajiide sihke báikkálaš ja mearrasámi guolásteddjiide, muhto maiddái olggobeale guolásteddjiide, geat bivdet Lágesvuona nuorttabealde ja dolvot guliid báikkálaš guollerusttegii Álddagohpis. Danne illudahttá sáhttit doarjut prošeavtta mas lea ávki ollugiidda dán guovllus, dadjá sámediggepresideanta Silje Karine Muotka (NSR) preassadieđáhusas.
Oasit Davvesiidda gielddas gullet Sámedikki ealáhusdoarjagiid doaibmaguvlui, ja danne lea vejolaš doarjut fitnodaga. Prošeakta heive maiddái bures ovtta Sámedikki vuoruhemiide mariidna ealáhusain, láhčči doaibmabijut ja prošeavttat mat váikkuhit buoret árvoháhkamii ja mariidna ávdnasiid viidásetbuvttadeapmái, erenoamážit dainna áigumušain ahte bisuhit ja nannet guollevuostáiváldimiid.
– Buorre infrastruktuvra lea dehálaš sidjiide geat ellet guolástemiin, ja dat veahkeha bisuhit ja lasihit barggolašvuođa mearrasámi guovlluin, dadjá Muotka.
