Dán jagi Folkelarm-riemuin čuojahit máŋga sámeartistta.
Dán jagi Folkelarm-riemuin čuojahit máŋga sámeartistta.
ÁRA-joavku lea okta dain golbma sámi joavkkuin geat leat válljejuvvon čuojahit dán jagáš Folkelarm álbmotmusihkkafestiválas Oslos čakčamánu 24.-26. beivviid.
ÁRA jovkui gullet Simon Issát Marainen, guhte juoigá ja lávlu, Axel Olle Sigurd Andersson, Frida Johansson, Johan Asplund, Daniel Wejdin ja Christian Augustin. Dát guđas lohket Folkelarmii ahte hábmejit musihka árbevieruid ja ođasmahttimiid vuođul, ustitvuođa ja liekkusvuođa vuođul ja juoigama ja improviserema vuođul.
– Mii sávvat min ovdanbuktima Folkelarmas buktit ovdán dieđu, ahte dat muitala dehálaš historjjálaš dáhpáhusaid birra ja čájeha ahte luohti sáhttá máŋgga ládje gullot, dadjá ÁRA Folkelarmii.
Folkelarm lágiduvvui vuosttaš geardde 2005:s Oslos, ja dan rájes leat dát doalut lágiduvvon jahkásaččat. Doaluid eaiggádit ja hálddašit FolkOrg, mii lea álbmotmusihka ja -dánssa organisašuvdna. Váldoulbmil lea márkanfievrredit álbmotmusihkkáriid.
Golbma sámejoavkku válljejuvvon
Davviriikkaid artisttat sáhttet ohcat beassat čuojahit Folkelarmas, ja de lea jury mii vállje artisttaid eavttuid mielde maid FolkOrg stivra lea mearridan. Jury earret eará geahčada makkár bealit artisttain leat maid dihte livčče boktit riikkaidgaskasaš márkana beroštumi.
Dán jagi ledje 140 artistta ohcan ja prográmma šaddá hui máŋggabealat. Muđuid galget maiddái sámi joavkkut Vassvik ja Furebotten & Buljo SIIDA čuojahit dán festiválas čakčat.
