Sámedikki dievasčoahkkin Stuorradikkis lea dál rahppon.
Sámedikki dievasčoahkkin Stuorradikkis lea dál rahppon.
Dievasčoahkkima rahpama oktavuođas doalai Stuorradikke presideanta Olemic Thomessen sártni, ja sávai buresboahtima Stuorradiggái.
Sámedikki dievasčoahkkin dollo dán vahkkus Láhkadiggelanjas Stuorradikkis.
– Lea stuorra illu munnje beassat sávvat didjiide buresboahtima deike Stuorradiggái. Vuosttaš geardde historjjás doallá Sámediggi dievasčoahkkima dáppe Stuorradikkis. Sámedikki 25 jagi ávvudeami oktavuođas leat mii bovden din deike, dajai Olemic Thomessen.
Thomessen guhte ieš lea kulturberošteaddji gesii erenoamážit ovdan sámi kultuvrra ja mo dat lea ovdánan maŋimuš jagiid. Son namuhii erenoamážit sámi filmmaid, muhto maiddái mo stuorraservodaga filmmat vižžet inspirašuvnna sámkultuvrras.
Maiddái Sámedikki dievasčoahkkinjođiheaddji Jørn Are Gaski doalai rahpansártni.
– Dát lea historjjálaš dáhpáhus, soaitá ahte sii geat álggahedje miellačájeheami dás Stuorradikki olggobealde 30 jagi áigi, niegadedje dán beaivvi boahtit go mii deike čoahkkanat čoahkinastit, dan eat dieđe, logai Gaski.
Maŋŋil go soai leigga geargan rahpansártniiguin de geigii Gaski muorragári skeaŋkan Sámedikkis Thommesenii, ja de lávlestedje Sámeálbmot lávlaga.
