Sámediggi addá maŋŋá čuohteduhát ruvnno sáltečáhcerusttegii Unjárgga gielddas.
Sámediggi lea addán 400 000 ruvnno doarjjan ođđa sáltečáhcerusttegii Kløvnes hámmanis Unjárggas. Rusttet galgá geavahuvvot gonagasreappáid seailluheapmái mat leat boahtán oalgesálašin báikkálaš rundierpmesbivddus. Rusttegis bisuhuvvojit gonagasreappát eallinaga dassážii go dat leat doarvái ollu ahte daid sáhttá sáddet viidáseappot njuovvamii ja reidemii.
— Dáinna doaibmabijuin sihkkarastit riddobivdiid gánnáhahttivuođa buorideami Unjárggas. Go sáhttá ávkkástallat runedierpmáin oalgesálašin, de ožžot guollebivdit stuorát árvoháhkama. Dát lea mielde sihkkarastimin bargosajiid ja mii doaivut maiddái ahte dát buoridivččii rekrutterema ámmáhii Unjárggas, dadjá sámediggeráđđi Silje Karine Muotka (NSR) preassadieđáhusástis.
Fáladat báikkálaš bivdiide
Unjárgga gielda dat ohcá ja čađaha doaibmabiju. Rusttet lea fálaldahkan báikkálaš bivdiide geat geavahit guollevuostáiváldima Kløvnes hámmanis.
— Láhčit doaibmabidju mii váikkuha buoret árvoháhkamii mariidna varasávdnasiin lea okta min áŋgiruššansurggiin, erenoamážit jos dat váikkuhit guollevuostáiváldima nannemii sámi guovlluin. Danne leat mii movtta Unjárgga gieldda álgaga geažil ja sávvat áinnas doarjut eanet dákkár doaibmabijuid áiggis ovddos guvlui, dadjá Muotka.
Sámediggi lea ollu jagiid badjel dorjon huksemiid Kløvnes hámmanis, ja doaibmabijuin lea leamaš beaktu ja leat buktán positiiva ovdáneami guolástusas Unjárggas, čállá Sámediggi.
Ožžon 500.000 ruvnno
Unjárgga gielda ozai 500.000 ruvnno doarjaga. Árat dán jagis oaččui Unjárgga gielda 100 .000 ruvnno doarjjan galmmihanrádjui Kløvnes hámmanis. Ovttaskas ohcci ii oaččo eanet go 500 000 ruvnno ohcanvuđot doarjaga jahkái, ja danne juolluda Sámediggi 400 000 ruvnno prošektii. Doarjja addojuvvo doarjjaortnegis Doarjja vuođđoealáhusaide, mariidnaealáhusat.
