Kárášjoga gielda bággehallá dál bassat seinniid ja dáhkiid albmaládje dearvvašvuođaguovddážis, maŋŋel go bargit Bargobearráigehččui leat váidalan heajos áimmu ja duolvva.
Kárášjoga gielda lea ožžon dieđu Bargobearráigeahčus ahte sáhkkohallet 1000 ruvnnuin beaivvis, dahje guhtta duhát ruvnno vahkus, jus eai leat buoridan áimmu dearvvašvuođaguovddážis ovdal miessemánu 1. beaivvi 2015.
Eai vástidan
Bargobearráigeahčču lea golggotmánus juo diibmá gohččon buoridit áimmu dearvvašvuođabargiide, muhto Kárášjoga gielda ii lean vástidan áigemeari siskkobealde, mii lea leamaš mánu áigi, guovvamánus.
Bearráigeahčču cuiggoda Kárášjoga dearvvašvuođaguovddáža heajos áimmu. Sii čállet doppe lea váttis heivehit lieggasa, áibmojođu ja áimmu láktasa. Dát dahká juohke beaivvi unohasvuođa ja buktá hástalusaid bargiide. Go bargobearráigeahčču fitná bargosajiin, hupmet sii sihke jođiheddjiiguin ja bargiid ovddasteddjiiguin.
Raporttas boahtá ovdan ahte ii oktage sis geat ledje fárus dán bearráigeahčus, leat goassege oaidnán ahte viesus leat bassan seinniid ja dáhkiid siste, nu guhká go sii leat bargan doppe. Danne šaddet sii gillát duolvvaid ja gavjjaid siste.
– Eat sáhkkohala
Kárášjoga gielda lea vástidan sáhkkovárrehussii. Sii lohpidit dán jagis ođastit bassanplána, ja divodit áibmomolsunrusttegiid ja dassážii áigot caggat lásiid, Dearvvašvuođa- ja fuollaossodaga hoavda Randi Johansen Paltto lea sihkar sii eai oaččo sáhkuid.
– In mun bala mii sáhkkohallat. Mii leat vástidan ahte dán giđa mielde galget dat barggut dahkkot. In dieđe juste goas, muhto galgá bassot birra dán ossodagas, ja áibmorusttegat galget maid buoriduvvot, dadjá son.
Basse 2010:s
Helge Nystad, geas lea ovddasvástádus dan ossodahkii masa gullet gieldda visttit, duođašta sii leat ovdalaš juovllaid juo bassan guokte áibmomolsunrusttega, ja boahtte vahkus basset vel dan goalmmáda.
– Muhto áibbas buorre ii šatta ovdal gielda vuoruha áibbas ođđa rusttegiid oastit. Dálá rusttegiin ii sáhte lieggasa bonjadit ge, čilge son.
Eai vuoruhan
Nystad mieđiha ahte viesu eai leat bassan birra guhkes áigái danne go eai leat njulgestaga vuoruhan dan.
– Ii leat várra basson viđa jahkái. Boares plána mielde, mii lea čállon 1992:s, ii dárbbaš ge bassat eambbo juohke njealját jagi. Dál leat ođđa gáibádusat, ja mii áigut ođastit dien plána dán jagis. Muhto juohke jagi gal ii galgga goitge bassot, go gáibádus lea juohke nuppi dahje goalmmát jagi.
– Leat go bargit dutnje váidalan duolvvaid?
– Juo, leat, ja danne mii váldit ge geasset dan maid nagodit, dadjá Nystad.
