-Almmuhus-
-Almmuhus-
OĐĐASAT Šaddá vuolidit robi

Šaddá vuolidit robi

-

-

Ikte mearriduvvui ahte Anni Østby šaddá vuolidit robi iežas dálus, ovcci jagi maŋŋil go huksehii dálu.

Ikte meannudii Kárášjoga gieldda Biras-, plána- ja servodatovdáneami váldolávdegoddi, ášši mii váidui gildii 2006:s. Dalle huksehii Anni Østby dálu mas šattai rohpi birrasiid guokte mehter alladeappot go masa lei ožžon huksenlobi. Kránnját váide ášši gildii ja dan rájes lea leamaš eahpesihkar šaddá go rohpi vuoliduvvot vai ii.

 – Mii leat dál meannudan ášši ja čuovvolan ráđđealbmá evttohusa, dat mearkkaša ahte stohpoeaiggát ferte vuolidit robi, dadjá váldolávdegotti jođiheaddji Nils Nilsen Gaup.

 

– Váivves ášši

Gielda lea máŋgii meannudan ášši, muhto dássážii leat dohkkehan Østby huksema ja hilgon kránnjáid moaitámušaid.

 – Mearrádusat maid ovdal leat dahkan eai leat dohkkehuvvon, sihke Fylkkamánni ja Siviilaáittardeaddji leat gohččon min ođđasit meannudit ášši. Loahpas lea vel Ráđđehus ge čállán midjiide garra reivve gos celket ahte gielda ii sáhte dohkkehit go olbmot ieža huksejit dáluid nu mo háliidit, dadjá Gaup gean mielas dát lea leamaš váivves ášši.

 – Mii eat leat beassan váldit vuhtii olmmošlaš beliid, ja danne lea váivves ášši dát, dadjá Gaup.

 

Guovddášbellodagas eará árvalus

Gaup muitala ahte maiddái ievttá čoahkkimis geahččaledje muhtimat buktit vuosteevttohusa.

 – Guovddášbellodat vikkai buktit iežas evttohusa, man gesse ruovttoluotta maŋŋil go gieldda advokáhtta lei čilgen ahte ii jáhke Fylkkamánni dohkkehit dan. Sin evttohusa mielde ii lean stohpoeaiggát gártat šaddat vuolidit robi, čilge Gaup.

 

Jándorsáhkut

iFinnmark dieđuid mielde lea lávdegoddi cealkán ahte rohpi ferte rievdaduvvot ja vuoliduvvot lobálaš allodahkii ovdal go ovcci mánu leat gollan. Jus dassážii ii leat dan dahkan de sáhkkohit viessoeaiggáda plána- ja huksenlága mielde. Østby oažžu de jándorsáhkuid ja galgá máksit 200 ruvnnu juohke jándor ovddas.

 

Ii vuollán

Vaikke dát ášši lea ge jorran iešguđet orgánaid gaskkas jo ovcci jagi, de ii loga gal stohpoeaiggát Anni Østby ášši vuos čielgan.

– Ášši ii leat nohkan dása, mun áiggun váidalit gieldda mearrádusa, ja de šaddet ođđasit meannudit dan, dadjá son Ávvirii.

- Advertisement -
-Almmuhus-