Norgga universitehta rektor nammaduvvon gudnedoavttirin Ruoššas.
UiT Norgga árktalaš universitehta rektor, Anne Husebekk, nammaduvvui dán vahkku gudnedoavttirin Ruošša universitehtas Arkhangelskas.
Stuora dáhpahus
Skábmamánu 16. beaivvi nammaduvvui son gudnedoavttirin Northern (Arctic) Federal Universitys (NArFU) buori barggu ovddas dutkama, oahpu ja riikkaidgaskasaš ovttasbarggu ovddas.
– Lea stuora dáhpáhus nammaduvvot gudnedoavttirin olgoriikka universitehtas. Dát addo ovtta olbmui, muhto mun válljen geahččat dan bálkkašupmin ovttasbarggu ovddas. Mis lea leamaš guhkes ja buorre ovttasbargu NArFU:in, ja dainna áigut joatkit ain boahtteáiggis, buorrin goappašat beliide, dadjá rektor Anne Husebekk.
Medisiidna lea mu fága
Odne oažžu dan seamma nammadeami Northern Sate Medical Universitys (NSMU), danne go son persovnnalaččat áŋgiruššá čađahit NSMU ja UiT Norgga árktalaš universitehta oktasaš ovttasbargoprošeavttaid.
Erenoamážit dáid geažil; PhD-prográmma (ArkTroPP), riikkaidgaskasaš prošeakta kardiovaskuleara buozalmasvuohta Ruoššas (IPCDR) ja persovnnalaš doarjja «Heart to Heart» -vuolggaheapmái.
– Medisiidna lea mu fága, ja lea stuora gudni oažžut dákkár nammadeami NMSU:s. Fas lea UiT ja NMSU buorre ovttasbargu mii gudnejahtto máŋggaid jagi čađa. Lean hui čeavlái dainna ovttasbargguin, dadjá Husebekk.
