UiT – Norgga árktalaš universitehta lea tiŋgon ođđa riddofatnasa mii galggašii FF Johan Ruud ja FF Hyas riddofatnasiid sadjái.
– Riddofanas lea dehálaš ja dárbbašlaš infrastruktuvra min studeanttaide ja dutkiide árktalaš ja mearrafágaid oktavuođas. Mii leat ilus go mii jagi 2023:s oažžut ođđa ja dálá áigásaš fatnasa, mii galggašii FF Johan Ruud ja FF Hyas riddofatnasiid sadjái, lohká rektor Anne Husebekk preassadieđáhusas.
Dát ođđa riddofanas galgá geavahuvvot dutkama ja oahpaheami oktavuođas riddolagaš čáziin, sihke geodieđasuorggis, biologiijas, reaidoteknologiijas ja riddolagaš dádjadeamis dahje navigeremis. Dasa lassin galgá geavahuvvot vákšut UiT áhpestašuvnnaid, čoaggit áhpebirasdieđuid, oahpahanávdnasiid ja geahččalit ođđa reaidduid ja ođđa teknologiija.
Dárbbašlaš dutkamii ja oahpaheapmái
Fatnasa hukse Vaagland Båtbyggeri AS, ja fanas lea ovdánahttojuvvon ovttasráđiid Skipskompetanse AS fitnodagain.
Fanas šaddá 26,42 mehtera guhku ja 10 mehtera govddu. Fatnasis leat oađđinsajit 14 olbmui. Oahppolanjat lea logi olbmui ja fatnasis leat guokte laboratoriija. Fatnasis maid sierra sadji dádjadanoahpaheapmái. Das leat maid vinšaráhkkanusat ja elektrovnnalaš skádjaloattat.
