Ruoŧa eaiggáduššan ruvkefitnodat LKAB dieđihii mánnodaga ahte sii investerejit 400 miljárdda – dat stuorimus industriijainvesteren Ruoŧas goassege.
LKAB buvttada dál ruovdepelletsa, muhto áigu dál maid buvttadišgoahtit nu gohčoduvvon «ruovdeguobbariid». LKAB fitnodaga hoavda Jan Moström dajai preassakonferánssas mánnodaga ahte sii investerejit 400 miljárdda guoktelogi jagis dan ođđa karbondioksiidakeahtes buktagii ruovdeguobbariid. Dan sáhttá buvttadit hydrogengásain mii lea buoret lundui.
Dat dagaha ahte fitnodat dál galgá unnidit karbondioksiidanuoskkideami 35 miljovnnain tonnain jahkásaččat. Dat lea guokte goalmmádasoassi olles Ruoŧa luoitimis.
Duppalastet buvttadeami
LKAB fitnodat áigu bidjat 10–20 miljárdda ruvnno jahkásaččat dan doibmii ja duppalastit buvttadeami 2045 rádjái.
Dat investeremat galget maid LKAB dieđuid mielde buktit 2000-3000 ođđa bargosaji Gironii ja Jiellevárrái. Muhto gávdnojit maid váttisvuođat go dat buvttadeapmi gáibida maid eanet nu gohčoduvvon ruoná energiija ja bioboáldamuša, dieđiha LKAB fitnodat preassadieđáhusas.