Dán vahkkoloahpa lágiduvvo riikkadeaivvadeapmi russaide Lulli-Norggas Stavangeris. Dat lea dáhpáhus masa buot russat leat illudan. Dohko leat earret eará álttárussat manname.
Russa Thea muitala ahte son ja su olbmát leat veahá balus ovdal deaivvadeami, maŋŋel go muhtun russaid juhkosii eará russadeaivvadeamis lei biddjon várálaš gárrenmirku.
– Mii, russajoavku, leat humadan dan birra ja ráhkadan njuolggadusaid mo mis galgá leat go leat dán deaivvadeamis. Earret eará leat bidjan ala «find my iPhone» buot telefovnnain ja vurken nubbi nuppi nummáriid heahtenummárin vai gullo go riŋge vaikko livččii ge jietna jáddaduvvon telefovnnas.
«Russepodden» nammasaš podkásttas sii hupmet earret eará dan birra, gárrenmirkkuid birra russaáiggis ja dan birra ahte fátmmastit buohkaid mielde russabiillaide.
«Russepodden»
Dát podda almmuhuvvui cuoŋománu 26. beaivvi. Lea dán jagáš russastivra mii ráhkada sisdoalu podkástii – dakkár fáttáid mat gusket nuoraide. Dál leat podkástta rávdnjen juo 1 000 geardde. Sii geat eanemusat guldalit dan leat gaskal 18 ja 22 jagi. Dat lea maid dát ahkejoavku mii lea podkástta ulbmiljoavku.
Podkásta lea Álttá suohkana prošeakta maid Kreativ Industri ráhkada.
