Ruoŧas ii leat lohpi galledit boarrásiid buhcciidruovttuin, muhto golggotmánu 1. beaivvi rájes rahpet fas uvssaid gallededdjiide.
– Ruoŧas rahpet uvssaid sidjiide geat háliidit galledit boarrásiid buhcciidruovttuin, dadjá sosiálaministtar Lena Hallengren. Galledangielddus lea leamaš cuoŋománu 1. beaivvi rájes.
Ráđđehus lea guhkidan gildosa máŋgga geardde.
Ulbmil lea leamaš hehttet koronanjoammuma. Suohkanat, main lea ovddasvástádus boarrásiidfuolahusaide, leat leamaš duhtavaččat dainna ortnegiin, bargoaddiorganisašuvdna Sveriges kommuner och regioner (SKR) vuođul.
Muhto ii leat leamaš dušše buorre. Buhcciidruovttuid ássit, geat ovdalaččas juo gullet uhkiduvvon jovkui, sii leat dovdan oktovuođa ja isolerejuvvon. (©NTB)
