Ruoŧa ráđđehus dieđiha preassadieđáhusas ahte sii nannejit unnitloguálbmogiid vuoigatvuođaid Ruoŧas ja juolludit 4,1 miljovnna ruvnno iešguđet organisašuvnnaide, earret eará Ruoŧa Sámediggái.
Unnitloguálbmogiidda gullet sápmelaččat, romer álbmot, juvddálaččat, ruoŧasuopmelaččat ja duortnuslaččat. Juolluduvvon ruđat galget mannat diehtojuohkimii, giellabargguide ja juolluduvvojit organisašuvnnaide mat ovddastit daid unnitloguálbmogiid Ruoŧas.
– Mii fertet joatkit bargat Ruoŧa unnitloguálbmogiid vuoigatvuođaid ovddas, dat lea deaŧalaš álbmotrivttiid ektui. Danin lean ilus go mii dál nannet barggu seailluhit unnitlogugielaid, ja maid diehtojuohkima dadjá Ruoŧa ráđđehusa kultuvra- ja demokratiijaministtar Amanda Lind.
Ruđat juolluduvvojit earret eará Ruoŧa Sámediggái ja maid Leanastivrii Stockholmii. Dat galget bargat diehtojuohkimiin gielddaide, eiseválddiide ja regiovnnaide unnitloguálbmogiid rivttiid birra. Diehtojuohkin lea deaŧalaš oassi vai unnitlogu álbmogiid rievttit váldojuvvot vuhtii čállá Ruoŧa ráđđehus preassadieđáhusas.
