Son bissehuvvui Storskog bokte, ja lea dál dubmejuvvon rájusgiddagassii guovtti vahkkui Sis- ja Nuorta-Finnmárkku diggegottis.
Dievdu bissehuvvui golggotmánu 11. beaivvi, go lei jođus eret Norggas. Sus ledje guokte drona ja eará elektrovnnalaš vurkenrusttegat fárus. Bearjadaga, bidje dievddu rájusgiddagassii guovtti vahkkui.
Politiijaadvokáhtta Anja Mikkelsen Indbjør muitala NTB:i ahte sii ožžo diehtit ášši birra, go duollus bissehedje dievddu dábálaš dárkkistusas.
Badjelaš 50-jahkásaš dievdu lea čilgen ahte son lea leamaš Norggas turistan, ja dan dihte son lea leamaš riikkas borgemánu rájes.
Golbma pássa
– Mii leat bidjan dievddu rájusgiddagassii dan dihte go son lea goalmmát riikka borgár, iige leat gullevašvuohta Norgii, muitala Indbjør NTB:i.
Dievddus ledje golbma pássa, guokte Ruošša pássa ja okta Israela pássa. Dat mielddisbuktá ahte dievdu lea guovtti riikka stáhtaborgár. Ii leat eahpenormála ahte ruoššain leat guokte pássa, go lea visumas ja steampaliin sáhka.
Oaidnán dronaid
Gaskamuttu čakčamánu oidnogođii mediain ahte leat olu dovdameahttun dronat álgán girdit oljoplattfoarbmaid ja eará offshore-rusttegiid birra Davvimearas.
Justiisaministtar Emilie Enger Mehl (GB) muitala NTB:i ahte lea buorre go politiijat leat áicilat ja sis lea buorre kontrolla Storskogas.
Son ii dáhto kommenteret eaŋkilášši, muhto muitala ahte leat biddjon johtui doaibmabijut go Storskog bokte lea eambbo aktivitehta dál.
– Ruoššain ii leat lohpi girdit dronain Norggas ráŋggáštannjuolggadusa geažil, muitala Mehl.
Doaibmabijut leat biddjon johtui maŋŋel go Nord-Stream kábelat álge suođđat ja leat vuhtton eambbo dronat áimmus.
©NTB
