Sámediggepresideanta Silje Karine Muotka oassálasttii EU Arctic Forum and Indigenous Peoples’ Dialogue dáhpáhussii Nuukas, Kalaalit Nuunatas. Fáddá lea riikkaidgaskasaš ovttasbargu árktalaš guovllus.
Muotka lea čalmmustahttán mo dálá energiijaváilivuohta ja elrávdnjekriisat Eurohpás sáhttet mielddisbuktit ahte nu gohčoduvvon «ruoná molsašupmi» energiijabuvttadeamis dáhpáhuvvá jođáneabbo. Stuorra fápmoprošeavttat plánejuvvojit ja ásahuvvojit eamiálbmotguovlluin davvin. Sámediggepresideanta muittuhii man dehálaš de lea vuhtiiváldit eamiálbmogiid vuoigatvuođaid.
– Ruoná molsašupmi sáhttá leat čoavddus, jus mii dahkat dan rivttes láhkai. Eamiálbmogat fertejit dustet dramáhtalaš váikkuhusaid dálkkádatrievdamis, seammás go šaddet gillát eahpevuoiggalaš vahágiid dálkkádatdoaibmabijuid geažil. Danne lea dárbbašlaš ahte doaibmabijut leat sihke vuoiggalaččat ja vuohkkasat, dadjá Muotka Sámedikki Facebook siiddu bokte.
Dáhpáhus lea leamaš guovvamánu 8.–9. beivviid 2023.
