Kárášjoga searvvis, «Olbmot geaid borasdávda guoskkaha ja sin oapmahaččat», lea diehtojuohkinbeavdi Coopa olggobealde golggotmánu 12. beaivvi.
Sii sávvet buohkaide buresboahtima oažžut dieđuid 2019 Rosa sløyfe áŋggirdeamis, ja maiddái dieđuid searvvi birra mii lea sin várás geaidda borasdávda guoskkaha ja sin oapmahaččaide Kárášjogas.
Diehtojuohkin olggobeale Coop
– Mis lea Kárášjoga Coop olggobeale diehtojuohkin rosa sløyfe akšuvnna birra, muhto muitalit maid joavkku birra mii mis lea Kárášjogas. Joavkkus leat mielde olbmot geasa guoská borasdávda ja oapmahaččat, dadjá Seija Guttorm.
Diehtojuohkimis guossohit sihke káfe ja keavssaid. Márkanii bohtet maid čižžedolliid heaŋgut.
– Boahtit juohkit gihppagiid maid. Gihppagat leat sihke dárogillii ja sámegillii. Dáid ožžot olbmot váldit vuoi besset lohkat, go doppe leat dehálaš dieđut, muitala Guttorm.
Čoaggá ruđa dutkamii
– Rosa sløyfe akšuvdna čoaggá ruđa čižžeborasdávddadutkamii, miehtá Norgga. Dán jagi lea fáddá ahte juohke ovttas galgá leat vejolaš oažžut divššu mii su borasdávdii heive, muitala Seija Guttorm.
– Vuovdit maid rosa sløyfe buktagiid, earret eará smávva čiŋaid, náluid ja veahá makkárge buktagiid maid sáhttá darvvihit biktasiidda. Sisaboahtu manná rosa sløyfe akšuvdnii, dadjá Guttorm.
Dehálaš juohkit dieđuid
Seija Guttorm dadjá ahte lea dehálaš addit olbmuide dieđuid.
– Dehálaš min mielas dan dihtii ahte olbmot galget oažžut dieđu čižžeborasdávdda birra. Go oažžu mammografi dutkamii bovdehusa de lea dehálaš fitnat iskamin, dadjá Guttorm.
Son maid muitala ahte berre ieš oahppat iskat leat go boasttuvuođat.
– Maiddái ieš oahppat iskat iežas rupmaša, iežas čiččiid. Diehtojuohkin lea hui dehálaš. Mis lea joavku Kárášjogas, gos leat searvvis olbmot geat leat vásihan iešguđetlágan borasdávddaid, muhtumin mii deaivvadit ja háleštit áššiid birra, muitala Seija Guttorm.
