Romssa gávpogis leavvá koronavirus ja oallugat válddihit koronaiskosa vai nagodivčče fas bissehit njoammuma. Dál lea suohkan rahpan goalmmát koronaiskanbáikki.
Gaskavahkku rabai Romssa suohkan ođđa koronaiskanbáikki Breivikahállii. Doppe lea rabas 08:30-21:30 bearjadaga rádjai, muhto doaimma viiddidit vahkkolohppii jus lea dárbu. Breivikahállas čađahit «drop-in» iskkademiid, ja dat mearkkaša ahte ii dárbbaš diŋgot diimmu ovdagihtii.
– Oallugat háliidit iskat lea go sis koronavirus, ja dasa lassin han mii leat dáhtton buohkaid, geat gallededje Tromsøbadet vuojadanbáikki mannan vahkkoloahpa, iskkahit iežaset. Danin leat ferten viiddidit koronaiskanvejolašvuođaid. Mii bivdit buohkaid iskkahit iežaset jus leat nurvos dahje dovdet eará dávdamearkkaid, lohká Romssa suohkana koronaguovddáža jođiheaddji Per Harald Korsmo preassadieđáhusas.
Romssa suohkanis lea maiddái koronaiskanbáiki Ruksesbáŋkus, gos lea vejolaš váddihit iskosa mas oažžu vástádusa dakkaviđe, ja ovddeš Kroken buhcciidruovttus gosa ferte diŋgot diimmu.
