-Almmuhus-
SMÁVVAOĐĐASAT SÁMISRiddu Riđđu festi­vála gáržži­duvvo dán jagi

Riddu Riđđu festi­vála gáržži­duvvo dán jagi

-

-

Riddu Riđđu 2021 šaddá earálágan festivála go dábálaččat. Dán jagi lea fokus ávvudit alla árvosaš sámi dáidaga dorvvolaš birrasis. Njoammuneastadeami dihte eai raba bearašcampa ja festiválacampa, ja gehččiidlohkku lea gáržžiduvvon 500 olbmui. 

– Mii leat ferten dahkat eaŋkil heivehemiid go háliidit čoahkkanit dorvvolaš dilálašvuođain. Riddu Riđđu láidesta sámi kultuvrii ja lea sámi deháleamos festivála. Mis lea stuorra ovddasvástádus ovddidit sámi dáidaga ja láhčit sámi deaivvadanbáikki. Ovdalii go šluhttet, de mii lágidit uhcit festivála, dadjá festiválahoavda Sandra Márjá West preassadieđus. 

Ođas

Riddu Riđđu álgá suoidnemánu 12. beaivvi ja bistá vahkku. Festiválas fállet nugo dábálaččat viiddis prográmma mas leat konsearttat váldolávddi alde, čájálmasat, filbmaprográmma, girjjálašvuohta, márkanat, dáiddačájálmas, seminára ja debáhtta.

Ođas dán jagi lea Stand-up prošeakta Reaškkas. Dán jagaš nuorra dáiddárat Gáddjá ja Biret Haarla ovdanbuktiba čájálmasa musihkain mas “inuitt-elektronika-strupesanggruppa Silla” čuojaha.  Emil Kárlsen almmuha álbuma Nagirvárrái. Gehččiid favorihtat ISÁK ja Felgen Orkester bohtet, ja Risten Anine ja Sara Marielle Gaup iežaska joavkkuin Ozas. 

Preassadieđus boahtá ovdan ahte gáržžidemiid dihte leat ollugat geat eai beasa doaluide, ja dan oktavuođas ožžot goluid máksot ruovttoluotta. Diehtu boahtá e-poasta bokte. 

Njoammueastadeami dihte ferte ovddalgihtii dieđihit muhtun doaluide. Eanet dieđuid gávnnat Riddu Riđu ruovttusiiddus. 

-Almmuhus-