Ovddit háve go leigga Riddulávddis, de leigga nuorabut ja easkaálgit. Dál máhccaba ruovttoluotta Riddui hárjánan artistan.
Ovddit háve go leigga Riddulávddis, de leigga nuorabut ja easkaálgit. Dál máhccaba ruovttoluotta Riddui hárjánan artistan.
Dát guokte sámi artistta, Marja Fjellheim Mortensson ja Niillas Holmberg, leigga Riddu Riđu nuorra artisttat 2014:s ja 2010:s. Dan rájes leaba goappašagat ovdánan hárjánan internašunála artistan. Dál máhccaba ruovttoluotta dan báikái gos oaččuiga lávddi ala lávket nuorran.
Ollu vásihan
Marja Fjellheim Mortensson lei mielde gonagasbára 25-jagi ávvudeamis ja su juoigan čájehuvvui NRK:s. Engerdal nieida lea lokten bajás Lullisámi luođi.
– Lea Riddu Riđđu mii lea skeŋken munnje lávddi ja vejolašvuođa ovdanbuktit musihka. Riddu bokte lean beassan leat oassin sámi musihkkabirrasis ja eamiálbmotbirrasis, muitala Mortensson ja joatká:
– Lean beassan mátkkoštit ja vásihit sierralágan vásáhusaid go lean beassan leat nuorra dáiddárin Riddus. Eará kultuvrraid deaivvadit lea buktán munnje motivašuvnna ja inspirašuvnna bargat dan maid mun ráhkistan.
Ollu rámi ožžon
Multidáiddár Niillas Holmberg 2010:s Riddu Riđu Nuorra dáiddár, ja lea ollu rámi ožžon sihke iežas musihka ja lyrihka ovddas. Boahtte geassái lea Riddu fas bovden dáiddára ruovttoluotta oassin elektronika-seaguhusain YLVA mas sámi aktivisma lea fáddán.
– Mii lea buoret vuohki šaddi artistii go beassat oahpásmuvvat sámi stuorámus lávdái? Munnje lea dat addán vejolašvuođa eallit ja birget dáiddárin. Dat jahki go ledjen Riddu Nuorra dáiddár, lea ain dat deháleamos festiválamuitu goassege, muitala Holmberg.
– Somá oažžut sin ruovttoluotta
Festiválahoavda Karoline Trollvik illuda.
– Lea nu buorre oažžut dáid artisttaid ruovttoluotta! Dat čájeha ahte min nuorra artisttaid vuoruheapmi lihkostuvvá. Leat nu ollu čeahpes nuorat Sámis, ja orrot maid lieđđume iešguđet dáiddasurggiin, muitala Trollvik.
Ohcet fas nuorra dáiddáriid
Dál lea Riddu Riđđu fas ohcame dán jagáš nuorra sámi dáiddára jagi 2016 ovddas. Buot surggiid dáiddárat sáhttet ohcat, ja nuorra dáiddár oažžu vel 25 000 ruvdnosaš stipeandda. Ohcci ferte leat gaskal 18-25 jagi boaris ja ferte deattuhit sámi osiid su dáiddalaš barggus. Eanet dieđut gávdnojit Riddu Riđu neahttasiiddus.
