Guovdageainnu penšunistasearvi lea rámis nuorra Fovsen-aktivisttaiguin.
– Guovdageainnu penšunistasearvi lea rámis go mii dal vásihit min nuorat nu čábbát ja ráfálaččat čájehit vuostemiela Fovsen-áššis. Sii vuohkkasit ja čehpet ovdanbuktet man dehálaččat min árbevirolaš birgenvuogit, min árbevirolaš meahcit ja duovdagat leat min eallimii, birgejupmái ja kultuvrii, čállá penšunistasearvi preassadieđáhusas.
Imašlaš ja balddihahtti
Penšunistasearvi cealká ahte bieggafápmofitnodagaid meannudanvuogit sihke Fovsen-áššis ja eará guovlluin baldet ja vurjet sin.
– Seammás, ráđđehusa áššemeannudeapmi alimusrievtti duomu ektui lea imašlaš ja balddihahtti, ja mii dovdat iežamet badjelgehččon ja dulbmojuvvon go dat lea áitta min sámi boahtteáigái, čállet vel preassadieđáhusas.
