NOAH, mii bargá elliid rivttiid ovddas, sávvá ahte priváhta rakeahttabáhčimat gildojuvvojit, ja ahte elliidustitlaš vuogit baicce vuoruhuvvojit.
Oanehis áiggis leat sii olahan 8000 vuolláičállosa nammavuolláičállinkampánjas mii sihtá rakeahttabáhčima gildosa ođđajageruohta, čállá NOAH preassadieđáhusas.
– Rakeahttabáhčin dagaha ahte eallit gillájit ja jápmet, primáralaččat bávkkeheami geažil. Bisseheames priváhta rakeahttabáhčima lea NOHA máŋgii váldán oktavuođa gielddain. Dál leat álggahan vuolláičállinkampánja masa lea stuorra beroštupmi. Dat illudahttá go nu máŋggas sihtet gildosa dollarusoniidda mat vahágahttet elliid, ja dat berre leat čielga signála politihkkáriidda, dadjá NOAH jođiheaddji ja šibitdoavttir Siri Martinsen.
Geahča video maid NOAH lea rahkadan.
Hušša goddá
NOAH čállá dasto ahte rakeahttabáhčin dagaha elliide balu, huša ja vahágahttima juohke jagi, ja beatnagat ja eará eallit masset heakka go huššaluvvojit báhčima geažil. Dat čuohcá maiddái meahcceelliide, ja lottit leat erenomáš hearkkes dilis.
