Birasdirektoráhtta ráhkadišgoahtá ođđa njuolggadusaid mat galggašedje muddet luossašlájaid bivdima čázádagain.
Lea vejolaš čázádagaid báikkálaš hálddašeddjiide evttohit juoidá dán áššái ovdal njukčamánu 15. beaivvi.
Romssa ja Finnmárkku fylkkamánni dieđiha preassadieđáhusas ahte Birasdirektoráhtta ráhkadišgođii ođđa njuolggadusaid 2019 čavčča, mat galggašedje muddet luossašlájaid guolásteami 2021-2025 áigodagas. Dáid njuolggadusaid mearrida Birasdirektoráhtta 2020 juovlamánu.
Romssa ja Finnmárkku fylkkamánnis lea ovddasvástádus čohkket evttohusaid báikkálaš johkahálddašeddjiin. «Veileder M_1633 – Retningslinjer for regulering av anadrome laksefisk fra 2021» (bagadalli anadroma luossašlájat guliid regulerennjuolggadusat) čállosis sáhttá lohkat dán ášši birra.
Bivdoáiggiin ja ráfáidahttimiin muddet
Čázádagaid anadroma luossašlájat guliid bivddu stivrejupmi lea mearriduvvon nationála mearrádusas mii mearrida guolástanáiggi ja njuolggadusaid mat leat čadnon iešguđet čázádagaid guolásteapmái.
Bivdoáigi lea dehálamos doaibmabidju muddet sállaša ja sihkkarastit ahte juohke guollešlája hálddašanulbmil fuolahuvvo dahje ahte lea ceavzilis bivdu. Lea maid vejolaš earret eará ráfáidahttit guovlluid ja guolásteaddji eari. Evttohusaid čállá skovvái maid oažžu Fylkkamánnis.
Eará olbmot sáhttet dan dahkat dábálaš gulaskuddamis 2020 geasi.
