Jus dáiddárat galget oahppat olbmo rupmaša sárgut, de fertejit beassat oaidnit álásolbmo barggadettiin. Danne ohcá ge Kárášjogas dáiddaskuvla dál olbmuid geat vuolggáše álásmodeallan sin ohppiide.
Jus dáiddárat galget oahppat olbmo rupmaša sárgut, de fertejit beassat oaidnit álásolbmo barggadettiin. Danne ohcá ge Kárášjogas dáiddaskuvla dál olbmuid geat vuolggáše álásmodeallan sin ohppiide.
Eanaš dáiddaskuvllat geavahit «akt-» dahje sámegillii álásmodeallaid veahkkeneavvun go oahppit galget oahppat sárgut olbmo rupmaša dahje anatomiija.
– Ii leat seksuála objeakta
Kárášjogas dattege ii leat nu álki gávdnat olbmuid geat arvvašedje vuolgit álásmodeallan, nu lea ge rektor Eva Aira dál ohcalan dákkáriid maiddái facebook bokte.
– Dáppe Kárášjogas lea álot hástalus gávdnat olbmuid geat arvet álás leat modeallan min ohppiide, mun in dieđe manne dat lea nu. Álásmodealla ii leat dakkár seksualiserejuvvon objeakta manin olusat soitet navdit, lohká Aira.
Rektor muitala ahte sin vuosttaš modeallas leige erenoamáš jurdda go searvvai dása.
– Son muitalii munnje ahte son háliida čájehit earáide ahte dát ii leat váralaš, muitala son.
Aira lohká iežas jáhkkit hástalussan gávdnat modeallaid go olusat ballet das.
– Jáhká ahte olbmot eai duostta, ahte sis soitet dakkár gáttut dán birra. Olbmuin soitet maid jorggu jurdagat rupmašiid birra.
– Jáhkát go ahte álásvuohta ii soaitte nu lunddolaš Kárášjogas?
– Soaitá nu. Muhto geasset han leat olbmuin unnán gárvvut badjelasas ja oidnojit de vaikke gos. Ja manne son ovdamearkka dihtii Gironis ja Johkamohkis lea álkit gávdnat modeallaid, gažada son.
Galgá leat áibbas álás
Son muitala alddiineaset lávet leat golbma olbmo geat lávejit álásmodeallan doaibmat go skuvla dárbbaša dan, dál dattege leat buot golmmas, iešguđet sivaid geažil, hehttejuvvon dahkamis dan.
Nu sávvá ge Aira gávdnat earáid geat arvet dán ámmáhii.
– Dat guhte vuolgá modeallan ferte leat áibbas álás. Son galgá čuožžut, čohkkát ja muhtumin veallát maid, čilge Aira.
(Ášši joatká gova vuolábealde)
Govven: Eva Aira
Eai oaččo hállat
Rektor lohká ahte modealla oažžu leat vaikke makkár, almmáiolmmoš dahje nissonolmmoš, gasibuš dahje ruoinnas.
– Min studeanttat eai kommentere moktege modealla rupmaša. Mun lean maid rávven sin ahte galget unnimus lági mielde hállat barggadettiin, baicce guldalit oahpaheaddji. Eai ge sii oaččo kommenteret eai ge háleštit modeallain eará go bottuin.
Lossa bargu
Olusat dáidet navdit ahte lea gehppes bargu leat modeallan, muhto rektora ságaid mielde de ii leat gal nu:
– Modealla galgá nagodit bissut seamma posišuvnnas čađat, leaš dal čohkkámin, čuožžumin dahje veallámin. Nu sáhttá šaddat seamma posišuvnnas bissut máŋggaid diimmuid, dieđusge oažžu bottuid gaskkohagaid, muhto de galgá fas seammá posišuvdnii máhccat, čilge son.
Danne leage dáiddaskuvllas maid bálká modeallaide.
– Muhto dainna bálkkáin ii dieđos rikko gal. Mii dárbbašat dál modeallaid golbma beaivve vahkkus golbma vahkku ovddasguvlui. Jus modealla lea duđavaš ja mii leat duhtavaččat de sáhttá oažžut fálaldaga joatkit miehtá jagi, čilge rektor ja muitala alddiineaset leat dárbbu modeallaide birra jagi.
Dássážii ii loga Aira vuos ovttage fállan leat modeallan.
– Oidnojit dušše gánddat facebookas «taggemin» nubbi nuppi somá dihtii, lohká son.
