Finnmárkku politiijaguovlu dieđiha ahte sii giddejedje Hámmerfeastta hámmana gaskavahkku gaskal dii. 08:00 ja 10:00, dan botta go rádje miinna hámmanálddis.
Miidna gávdnui Hámmerfeasttas njukčamánu 22. beaivvi, ja ikte eahkes mearriduvvui ahte rádjet eret miinna báikkis.
Suodjalusa miidnabuokčalankommándo bohte ikte Hámmerfestii, ja miidna lea dál gearggus loktejuvvot. Dálkedieđáhusaid mielde lea mearriduvvon ahte bargu álggahuvvo gaskavahkku dii. 09:00. Hámman lea de giddejuvvon buohkaide, earret go Borealis-fatnasiidda.
Go rádjan bargu álggahuvvo, de boahtá leahkit 400 mehtera birrasaš sihkarvuođagaskka miinnas. Dat mearkkaša ahte ii oktage galgga leahkit fatnasis dahje muđui čázis dan botta go barget. Politiijat árvidit ahte bargu bistá 30 minuvtta, ja ahte sihkarvuođagáibádusat nohket ovttatmano go miidna lea dolvojuvvon eret siskkit bealis hámmanis.
