Boahtte čavčča rájes galget universitehtat ja allaskuvllat árvvoštallat leat go studeanttat olu dakkár oahpuin main lea lagas oktavuohta olbmuide ja elliide dohkálaččat dan fidnui masa sii váldet oahpu.
Dohkálašvuođaárvvoštallama ulbmil lea mearridit lea go studeanta vejolaš várra sidjiide geaiguin studeanta boahtá oktavuhtii hárjehallama oktavuođas dahje boahttevaš ámmátbarggus. Ovddežis gáibiduvvo gelbbolašvuođaárvvoštallan máŋgga oahpaheaddje- ja dearvvašvuođaoahpus, ja earret eará báhppa- ja giehtagielladulkaoahpuin.
Ođđa láhkaásahusas lea earret eará mearriduvvon ahte studeanttat geat váldet oahpu šibitdoavttirin, tuollárin, hállangielladulkan, dramapedagogan, dáidda- ja kulturgaskkusteaddjin, dáiddaterapevtan, osteopáhtan, skuvlaastoáiggepedagogan ja álbmotdearvvašvuođabarggus, galget maiddái árvvoštallojuvvot leat go dohkálaččat.
– Dáid oahpuid studeanttat ožžot oktavuođa olbmuiguin ja elliiguin hearkkes dilálašvuođain sihke praktihkalaš doaimmas ja go áiggi mielde vulget bargui. Danin lea dehálaš ahte universitehtat ja allaskuvllat árvvoštallet leat go studeanttat dohkálaččat dan fidnui masa sii váldet oahpu, ja ahte mis leat čielga njuolggadusat dasa, dadjá dutkan- ja alit oahpahusministtar Sandra Borch (Gb).
