Ráđđehus árvala ásahit našunála dárogielgealbogáibádusa mánáidgárdebargiide geain lea eará vuosttašgiella go dárogiella ja sámegiella.
Ráđđehus árvala ásahit našunála dárogielgealbogáibádusa mánáidgárdebargiide geain lea eará vuosttašgiella go dárogiella ja sámegiella.
Árvalus biddjui ovdan stáhtaráđis bearjadaga.
– Mánáidgárddi bargu ovdánahttit giela
– Mánáidgárddiid okta deháleamos bargun lea ovdánahttit mánáid giela, go giella lea čoavddus stoahkamiid ja ođđa ustitvuođaid dáfus. Danna lea dehálaš ahte mánáin leat rávisolbmot birrasis, geat sáhttet sin veahkehit ovdánahttit giela, lohká máhttoministtar Torbjørn Røe Isaksen preassadieđáhusas.
Ráđđehusa dieđuid mielde čájehit guorahallamat ahte goalmmádasoassi mánáidgárdejođiheddjiin, geain leat unnitlogugielat bargit, leat vásihan ahte dat bargit eai máhte dan mađe bures dárogiela ahte sáhttet háleštit váhnemiiguin, mánáiguin ja mielbargiiguin.
Galget čađahit dárogielgeahččaleami
Ráđđehusa árvalus mielddisbuktá ahte buohkat geat ohcet barggu mánáidgárddiin boahtteáiggis, fertejit čađahan dárogielgeahččaleami ja olahan vissis dási čálalaš ovdanbuktimis, guldalanáddejumis ja njálmmálaš gulahallamis.
Gáibádus guoská vuosttamužžan ohcciide geain ii leat mánáidgárdeoahpaheaddjeoahppu, muhto maiddái ohccit geat leat ožžon dárogieloahpu vuođđoskuvllas dahje joatkkaskuvllas, sáhttet beassat gáibádusas.
Ráđđehus árvala ahte gáibádus ii galgga guoskat mánáidgárddiide main lea bálvalus eará gillii go dárogillii.
(©NTB)
