Unnit johtolat geainnuid alde dagaha ahte muhtimat deaddilit gássa garrasit koronavirusa áigodagas.
– Maŋŋel go olbmot leat álgán ruovttuin leat, de leat unnit olbmot geainnuid alde, ja dalle leat unnit hehttehusat johtolagas, dadjá Vestlándda ja Rogalándda politiija guovllujođiheaddji Terje Oksnes.
Oksnes oaivvilda ahte sii geat vudjet garrasit dál, go riikkas lea duođalaš epidemiija, berrejit dovdat heajut oamedovddu go muđui.
– Eambbo roavva vuodjin dagaha ahte dearvvašvuođabálvalus vásiha dárbbašmeahttun noađuheami johtolatbárttiid dihtii, dadjá son.
