Politiija oktan eaktodáhtolaš ohcanjoavkkuin ohcet Álttá suohkanis jávkan tuiskalaš stáhtaboargára Álttás. Politiija dieđiha ahte ohcanjoavku lea dál ohcamin Stillageainnu oarjjabealde Stuorrajávrri guvlui go jávkan olbmo biila gávdnui das.
Politiija lea dál ohcamin 37-jahkásaš tuiskka stáhtaboargára gii ássá Álttás, gii vulggii meahccái vánddardit jáhkkimis suoidnemánu 8. beaivvi, dieđiha Finnmárkku politijaguovllu preassadieđáhusas. Bearrašii ja skihpáriidda muitalii almmái ovdalgo vulggii ahte son áiggui jávkat birrasii 14 beaivvi, muhto ii muitalan gosa son vulggii. Son lea hárjánan meahcis johtit.
– Dál lea mannan dan mađe guhkes áigi dan rájes go manai, iige su bearaš dahje skihpárat leat gullan sus maidege, nu ahte politiija háliida iskat leago mihkkege sutnje dáhpáhuvvan, čálii Finnmárkku politiijaguovllu oktasaš rihkusášši dutkanjođiheaddji Anette H. Sætrang preassadieđáhusas mas bivddii álbmogis veahkki jus lea oaidnán su biilla dahje deaivan su meahcis.
Jávkan almmái biilla, guvges ivnnat Toyota RAV-2001 málle, lea dál gávdnon guđđojuvvon Savvona geainnu alde, mii manná Joatkka guvlui.
– Mii leat ija ohcan ja beaivvi mielde ohcagoahtit maid jávkan olbmo dronain Stuorrajávrri guvlui, muitala Finnmárkku politiijaguovllu operašuvnna jođiheaddji Robin Fure.
Doivot gávdnat olbmo heakkas
Preassadieđáhusa almmuheami oktavuođas ohcagođii politiija jávkan olbmo. Operašuvnna jođiheaddji Robin Fure muitala earret politiijaohcanjoavku, de lea maid ohcanjoavkkus dollačaskadanveaga, Rukses Ruossa, siviilasuodjalusa, norgalaš gádjunbeatnagiid olbmot mielde ohcamin.
– Mii leat ohcamin Joatkka guovllus. Mii ohcat beaivvi mielde ohcanguovlluplána mielde. Mii vuoruhat Stuorrajávrri guovllu, oarjjabealde das gos jávkan olbmo biila gávdnui Stillas / Savvonis, lohká operašuvnna jođiheaddji Robin Fure.
Son muitala sii leat ohcan ija jávkan olbmo ohcan mii leamaš jávkan measta mánu.
– Nu mo dilli lea dál, de ohcat su go mii háliidat gávdnat su heakkas. Eat mii leat joavdan dan dássái ahte navdit son ii leat heakkas. Mii ohcat ja árvvoštallat dađistaga go oažžut ođđa dieđuid, lohká operašuvnna jođiheaddji Robin Fure.
Dieđit politiijai
Jus ovttasge leažža dieđut jávkan albmá birra, válddes oktavuođa politiijain telefuvdnanummir 02800.
Jávkan albmá dieđut:
Almmái lea 37 jagi boaris
Devkes ivnnat vuovttat ja skávžá
Hállá tuiskka- ja dárogiela, muhto háliida eŋgelasgiela hállat vaikko ádde dárogiela.
Dábálaš rumašlaš hápmi, birrasii 175-180 sentte guhkki.