Hámmárfeastta suohkan dieđiha ahte lea korona sin suohkanis fas.
Vuossárgga juovlamánu 28. beaivvi diibmu 11.30 lea Hámmárfeastta suohkan ožžon vuot duođaštuvvon covid-19 njoammuma, čállá suohkan Twitteris.
Bargái njommon
Suohkana diehtu lea ahte ovtta offshore-bargái lea njommon dávda. Son iskojuvvui go olli Hámmárfestii. Njoammunguorranjoavku bargá áššiin.
Guoktásis korona
Hámmárfeastta suohkan dieđihii máŋŋebargga juovlamánu 23. beaivvi ahte suohkanis ii leat ovttasge korona, buohkat ledje dearvvašnuvvan ja beassan isolašuvnnas eret. Mannan bearjadaga, 25. beaivvi, bođii diehtu ahte muhtumis, gii lei fitnamin Hámmárfeasttas, lea duođaštuvvon korona. Dál lea suohkanis guoktásis duođaštuvvon dávda.
Bargit erremis
Finnmárkku buohcceviessu dieđiha fas ahte Hámmárfeastta buohcceviesus ii leat oktii ge njommon korona, muhto guokte bargi leaba erremis.
