Odne, bearjadat eahkeda, lea leamaš biilalihkohisvuohta Idjajávrri lulábealde, Kárášjoga gielddas. Okta lea sáddejuvvon Hámmárfeasta buohccevissui ja njealjis leat iskkadeames Kárášjoga dearvvašvuođaguovddážis.
Finnmárkku politiijaguovllu operašuvdnajođiheaddji Svein-Erik Jakobsen muitala ahte biila lea vuodjan njuolga nuppi biilla maŋŋegeahčai, mii lei measta jaska čuožžume.
– Lea Ruošša biila mii lea vuodján nubbi biilla njeaiga, mii lea Norgga biila. Norgga biillas ii lean eará vuoddji, gii lea sáddejuvvon Hámmárfeasta buohccivissui, muitala Jakobsen.
(Ášši joatká gova vuolde)
Sus eai lean odne diibmu 21:00 áigge dieđut man bahuid norgalaš lea roasmmuhuvvan
Sádden Kárášjoga dearvvašvuođaguovddážii
Muđui sáhttá operašuvdnajođiheaddji Svein-Erik Jakobsen muitalit ahte Ruošša biillas ledje njeallje olbmo geaid leat dolvon iskkadeapmái Kárášjoga dearvvašvuođaguovddážii. Su dieđuid mielde eai galgga sii ge bahuid fysalaččat bávččagan.
– Dál eat dieđe manne Norgga biila lei measta jaska čuožžume, muhto báikkis galgá leat leamaš veahá guoldu. Dat sáhttá leat leamaš sivva. Eat ge dieđe vuos manne Ruošša beale biilla lea vuodján njuolga njeaiga, lohká son.
(Ášši joatká gova vuolde)
Leahttu
Finnmárkku politiijaguovllu operašuvdnajođiheaddji Svein-Erik Jakobsen lohká ožžon dieđuid ahte goappašat biillat leat ollu roakčanan, ja báikkis leat leamaš buot alit čuovga etáhtat ja báikkis leat maid gádjunbiillat viežžan cuovkanan biillaid.
– Lea leamaš leahttu go lea vuodján njeaiga, muhto in áiggo dadjat ahte lea beare leahttu leamaš, dadjá Jakobsen.
Loahpas vel lohká ahte eai várut goappá ge vuoddji gárrenoaivvis vuodján.
