Geassemánu loahpageahčen lágida Sámi girkoráđđi riikkaidgaskasaš konferánssa Troanddimis álgoálbmogiid ja soabadanproseassaid birra. Konferánssas biddjojuvvo fuomášupmi dasa ahte girkus lea erenoamáš ovddasvástádus ja rolla nationála soabadanproseassain.
Geassemánu loahpageahčen lágida Sámi girkoráđđi riikkaidgaskasaš konferánssa Troanddimis álgoálbmogiid ja soabadanproseassaid birra. Konferánssas biddjojuvvo fuomášupmi dasa ahte girkus lea erenoamáš ovddasvástádus ja rolla nationála soabadanproseassain.
Sámediggeráđđi juolluda 150 000 ruvnno girku riikkaidgaskasaš konferánsii álgoálbmogiid ja soabadanproseassaid birra.
– Dát lea oassi min barggus duođaštan- ja soabadanproseassa ásaheami oktavuođas dáruiduhttinpolitihka ektui, dadjá sámediggeráđđi Henrik Olsen.
Koloniserema váikkuhus
– Konferánsa lea deaŧalaš oassi min iežamet gelbbolašvuođa ja fuomášumi nannemis koloniserema váikkuhusaid ektui. Norggas lea mis min iežamet historjá sámiid ja kvenaid dáruiduhttima birra. Girku lei guovddáš instrumeanta koloniserema ja dáruiduhttima oktavuođas maiddái dáppe. Juste danne lea deaŧalaš doarjut dákkár konferánssa ja álgaga, dadjá sámediggeráđđi Henrik Olsen.
Ain hávit
Olsen deattuha ahte koloniserema váikkuhusat, vealaheapmi ja dáruiduhttin ain váikkuhit oktavuođaid sámiid ja dáčča majoritehtaservvodagas.
– Ovtta buolvvas leat ain hávit maŋŋel dán politihka. Ollu sámit váillahit máhtu sin historjjás ja sámi čanastahkii. Beaivválaččat leat ain giččut oažžut sámi oahpponeavvuid, sámi giellaoahpaheami, dásseárvosaš dearvvašvuođabálvalusaid ja iežamet kulturárbbi máhcaheapmi, deattuha Olsen.
Sámediggeráđđi lea dál ráhkkanahttime ášši Sámedikki dievasčoahkkimii čakčii, mas sisdoallu lea dáruiduhttima dokumentašuvdna ja luodda viidáset soabadeapmái.
Eará guossit konferánssas
Girkoráđi konferánsii servet earret eará ON eamiálbmotrivttiid erenoamášdieđiheaddji Victoria Tauli-Corpuz, Duohtavuođa- ja soabadankommišuvnna komiseara Canadas Marie Wilson ja Latin-Amerihká Girkoráđi eamiálbmotkoordináhtor Miguel Salanic.
