Oslo gieldda kulturlávdegotti politihkkárat leat ovttajienalaččat jienastan ahte Oslo gávpogis ja gielddas galgá leat sámi nama.
– Oaivegávpot galgá čájehit ahte Norggas maid leat álgoálbmogat, dadjá Oslo gieldda kulturlávdegotti jođiheaddji Sunniva Holmås Eidsvoll NRK:i.
Ovddit áigodaga gávpotráđđi lea jo evttohan Oslove virggálaš sámi namman gávpogii. Dál háliida gielda ahte Oslo gielda oččošii sámi nama maid.
Gieldda almmolaš namma golmma sámegillii šattašii de máttasámegillii Osloven tjïelte, julevsámegillii Oslo suohkan ja davvisámegillii Oslo suohkan dahje Oslo gielda.
Guhtta sámesearvvi Oslos leat ráđđádallan Oslo gielddain dán áššis. Sii dat ovttajienalaččat leat ákkastallan dan nammačovdosa ovddas maid Oslo gieldda politihkkárat ge leat dorjon.
Gieldda bealis maid rámidit Oslo sámiid go nu vuđolaččat ja bures leat bargan áššiin.
Oslo gávpotráđđi meannuda loahpalaččat dán ášši ovdalaš juovllaid.
Nu dieđiha NRK Sápmi.
